Vir Banting-aanhangers. Ons het hierdie heerlike weergawe van die immergewilde braaihoender geskep deur klapper pleks van broodkrummels in die bedekking te gebruik. Dus pas dit volmaak in by ’n geenkoolhidraat-, hoë-proteïen-eetplan.
Genoeg vir 6 mense
Bereiding: 10 min.
Gaarmaak: 15 min.
3 groot eiers
80 ml (⅓ k) water
125 ml (½ k) sterk sous
500 ml (2 k) droë klapper
sout en peper
2 ml (½ t) knoffelpoeier
2 ml (½ t) brandrissiepoeier
400 g hoenderstukke
olie vir diepbraai
- Verhit die stoof se warmlaai. Plaas ’n metaalrak op ’n bakplaat.
- Klits die eiers, water en sterk sous saam in ’n bak.
- Meng die klapper, sout, peper, knoffelpoeier en brandrissiepoeier in ’n ander bak.
- Doop die hoender in die eiermengsel en bedek dit dan goed met die klappermengsel.
- Berei ’n bakplaat voor met ’n afkoelrak op. Hou dit byderhand om die gaar hoender in die oond om dit warm te hou as jy dit in sarsies braai.
- Verhit olie vir diepbraai in ’n diep pot. Sorg dat die pot nie meer as half vol is nie.
- Plaas ’n paar stukke hoender in die olie terwyl jy seker maak elke stuk het genoeg plek. Braai sowat 10 minute tot bruin en bros. Verplaas dit met ’n gaatjieslepel van metaal na die rak op die bakplaat en hou dit in die warmlaai warm terwyl jy die oorblywende hoender gaarmaak.
Deur Hope MalauFoto: David Briers